政情：黃錦星兒時都有土地問題

一家九口瞓兩張碌架床

黃錦星話自己出生於深水埗一個草根家庭，當時一家人住喺唐樓，屋企只有一張碌架床，父母瞓上格，佢哋五兄弟姊妹加塊板就瞓下格，好似沙甸魚咁。後來佢哋獲分配公屋，搬咗去慈雲山沙田坳邨，環境好咗，「一張碌架床變兩張碌架床」，家庭成員亦都增加，變成七兄弟姊妹，一家九口就瞓兩張碌架床。佢嗰陣起碼都上到樓住到公屋，依家好多基層市民輪候公屋，真係等到頸都長呀！

適逢尋日係情人節，被問到送乜嘢禮物畀太太就賣關子，仲即場自爆曾因送禮物問題而同太太發生拗撬添！話說佢喺冬天出世，所以太太每年都會送冬天衫畀佢做生日禮物，後來愈來愈多冬天衫，有啲甚至只着過一兩次，所以佢就叫太太唔好再送，點知就激嬲咗太太，畀太太鬧「送嘢畀你都咁多嘢講！」後來太太仲明言，以後佢生日都唔使收禮物喇。雖然冇禮物收，但黃反而仲鬆一口氣，覺得解決咗問題，直言開心生活先係無價。