政情：拒應承加入關係立立亂 專業議政箍唔實陳沛然
立法會近年立立亂，唔少無黨派議員都會各自埋堆。撞正尋日係情人節，專業議政就搞咗個新春傳媒茶敍，仲嗌埋無黨派嘅醫學界陳沛然（Pierre）出席添。咁耐以嚟Pierre都冇加入專業議政，但又會出席佢哋嘅活動喎。專業議政嘅會計界議員梁繼昌（Kenneth）形容係「拍緊拖」，而資訊科技界莫乃光（Charles）就話係成日出街食飯嘅關係，三個已婚議員講到「關係」就七國咁亂，到底佢哋係點呢？
Kenneth話Pierre不時都會「搭單」，例如同專業議政一齊見政府官員，或者好似尋日嘅新春團拜等，關係良好而穩定，不過可能彼此之間諗嘅嘢都有少少唔同，所以關係一直都冇再進一步，只係「有事就出嚟見，冇事就可以唔見」。Charles都有提起專業議政同Pierre嘅關係，仲話已經「成日約佢出街食飯、拖佢手仔」，但Pierre始終唔肯應承，仲要連原因都唔清楚啊！
陳愛自由身 逐個議題表態
至於點解唔「結婚」，似乎係素來自稱「中間派」嘅Pierre比較鍾意自由身，方便喺建制同泛民之間游走，例如早前喺政府提高長者綜援申領資格時，就可以同民主派一齊聯署；而講到「取締香港民族黨」時，就同建制派聯署，雖然Pierre及後退出咗嗰次聯署，但可見Pierre比較想逐個議題去選擇表達自己嘅立場，而加入專業議政會多咗掣肘可能亦係考慮之一。
Pierre尋日回應點解唔「結婚」時，都重申自己嘅意向冇改變過，仲話覺得依家合作得幾好，所以維持現狀都幾好，咁睇嚟唔通「神女有心，襄王無夢」嘞！
梁繼昌：唔擔心第三者搶人
雖然一直冇進展，但Kenneth都話專業議政係Open relationship（開放式關係），Pierre可以隨時加入，不過都講明大門並唔止係為Pierre而開，而係歡迎任何有相同理念嘅專業人士加入咁話。至於Pierre遲遲都未加入，會唔會擔心有「第三者」出現搶走Pierre，Kenneth就話唔擔心，相信Pierre同佢哋嘅理念最接近咁話。