中環出更：容海恩百無禁忌 未坐完月照落區
正所謂坐月坐得好，身體無煩惱，大部分女士生完BB之後都好重視坐月。不過上月二十三日先至生完B女嘅立法會議員容海恩（Eunice） 話咁快已經復工落區，仲去咗沙田沙角邨嘅大牌檔，似乎唔係太在意坊間嘅坐月禁忌咁噃。而Eunice喺同大牌檔老闆傾偈期間，就叫領展唔好加收咁貴租，實行唔放過領展。
趁機拍片 狙擊領展
尋日係情人節，不過喺Eunice身邊嘅男人就唔係佢老公袁彌昌，而係同佢同屬新民黨嘅沙田區議員潘國山等人。事關佢哋幾個就去咗沙角邨一間大牌檔。該大牌檔為領展租戶，將要進行裝修，要三個月後先再開業。Eunice就趁機會拍短片，叫領展啲租金「收順啲」，唔好咁貴，趕走啲小商戶。真係坐月都不忘「狙擊」領展。
雖然Eunice啱啱生完BB，但係睇落去佢都容光煥發，精神唔錯，片段中大牌檔嘅師傅仲大讚Eunice「好似靚咗咁多」添，氹到Eunice笑到不知幾開心喇！