中環出更：跑步風盛行助林曉盈拓專用手套市場
今個冬天寒冷嘅日子唔多，連農曆新年都破高溫紀錄，搞到唔少人要着住短袖衫拜年。卓妮早排喺一個團拜活動見到有「手套女王」之稱嘅香港青年工業家協會執委林曉盈，佢就大嘆今年無辦法喺香港用手套，生意少不免受影響，但近年多咗人跑步，可以開拓呢方面嘅市場喇！
林曉盈解釋，手套喺溫度唔太凍嘅地區仍然有得做，係因為唔少人要到早上或夜晚先有時間跑步，呢段時間氣溫仍然清涼，跑嗰陣時對手仲會赤赤痛，所以就令到跑步專用手套有市場，而且手套仲要撳到電話，又要放得到鎖匙、八達通等，所以呢方面嘅生意多咗好多，有賴追求健康嘅風氣盛行咁話。
同場仲有環保協進會總幹事邱榮光、中電企業發展總裁莊偉茵、離島區議會副主席余漢坤同太太劉玉蓮等，非常熱鬧。邱榮光今年就要着短袖衫拜年，佢更發現今個冬天鳳園嘅蝴蝶數量較往年大增，都係說明氣候變化嘅證據。佢仲話咪睇小蝴蝶數量大增，因為對生態環境有影響，例如搞亂樹嘅開花期，直指現時不止溫度變化，就連物理變化都出現咗，代表情況已經去到好嚴重。
余漢坤夫婦身體力行撐環保
愈嚟愈多人感受到氣候變化，亦令到社會環保意識提高，本身係時裝設計師嘅劉玉蓮講到，服裝設計已有環保布料，而讀書時教用廢物造衫，背後就係帶出環保意念，所以環保唔止局限於物料上。而余漢坤話自己環保，盡量選用公共交通工具，更話做垃圾分類已經係基本添！佢仲講到膠袋難分解，所以就提倡用去水器取代雨傘袋，直言為環保「樣樣都做啲」。
卓妮