在地盤辦公室內，工友強仔同管工明哥研究農曆新年長假期後復工安排。強仔：「明哥，新年長假有冇去邊度玩，我就玩咗好多唔同節目，玩餐飽，哈哈。」明哥：「強仔，睇你鬆毛鬆翼咁，雖然我哋喺假期前已經做好準備工作，但係好多人喺假期後因為無做好開工前檢查，就咁出意外。」
強仔：「放心啦，明哥，有名你叫，我係職安強仔，我假期前都已經知一定要做好工作場所整理，將所有工作崗位嘅機械設備、用具、物料、儀器、環境等清潔妥當，準備假期後開工有一個安全嘅工作環境。」明哥：「嗯，假期前成班工友都做得好，咁假期後呢？」
強仔：「假期後就梗係要確保開工安全，開工前要對工作環境、設施同埋機械進行較詳盡檢查。工作應由各單位嘅負責人及相關工友分擔。負責人須將檢查重點放喺高危地方，工友就必須根據安全工作指引或守則詳細檢查自己崗位嘅設備、工具、物料等。」
明哥：「無錯，公司都會給予足夠時間檢查。我哋都鼓勵工友報告任何危險狀況或特別改動以便改善，我哋都會跟進報告同進行調查及檢討，確保所有設備完善及喺安全情況下工友先開始工作。
不過，仲有一樣嘢我都會跟進，就係你嘅遲到紀錄，你今日遲到，已經留咗紀錄。」強仔：「吓，俾次機會啦，明哥。」
職業安全健康局
www.oshc.org.hk