政情：十號波照游水 莊健成邊游邊執樹葉
做開運動嘅人，都試過唔做唔舒服嘅感覺。做過元朗區議員嘅新界潮人總會主席莊健成鍾意游水，廿幾年來日日游一個鐘，真係一日唔游就唔舒服。佢笑笑口話，去年超級颱風「山竹」襲港期間，十號颶風信號高高掛，佢平時游開嘅屋苑會所泳池關閉，於是就喺自家露天泳池暢泳，結果要一邊游一邊執走啲落葉，好搞笑。
旅行公幹都要游
莊健成話，游水已經成為佢每日好重要嘅行程，未搬入依家住嘅屋苑之前，游遍港九新界嘅公共泳池，所以對好多泳池都好熟悉。就算出外旅行或公幹，都會特別留意有冇游泳設施，難怪佢應酬多多，但係身形都保持得宜。
佢嘅囡囡莊翠珊就笑住話，自細受爸爸影響，佢都好鍾意游水，小學時仲參加過校隊，但當時冇得揀習泳時段，又唔識搽防曬品，結果三個月之內由好白變成好黑，媽媽仲笑佢好似黑炭頭咁，所以依家多數做瑜伽同埋行吓山喇！