中環出更：葉劉狙擊領展 鍾國斌寸為選票
向來與領展有好深牙齒印嘅新民黨立法會議員葉劉淑儀，過去不時巡視領展商場、拍片放上網及喺立法會提口頭質詢等，近日佢更乘勝追擊，與工聯會議員麥美娟聯手提私人草案以規管領展租金，卻引來自由黨黨魁鍾國斌不滿，直指葉劉只為選票兼攞掌聲，葉劉就反指說法唔公道。兩人隔空開火，睇嚟遲吓喺立法會辯論時勢掀起一輪激辯！
話對修例規管上市公司有保留
鍾國斌尋日出席電台節目時，直指葉劉嘅法案「講出嚟好聽，可以攞票攞掌聲」，但實際上係行唔通。佢話領展可以「見招拆招」，就算有關法案上立法會、走晒程序，至少都要三年，期間領展實諗到點解決問題，隨時賣晒資產就算。佢又話，香港一直以嚟被評為最自由經濟體，對於要修例去規管上市公司有所保留，仲反問係咪領展社會責任做得唔好就要立法？但問到係咪一定會反對草案，佢就話要睇真啲內容再決定喎。
對於鍾國斌嘅正面抽擊，葉劉亦不甘示弱，她回應時直言自己只係回應市民嘅投訴，反擊鍾嘅說法唔係太公道。
卓妮