中環出更：屹立99年 王偉樑省靚老餅家招牌
香港品牌發展局早前舉行年度品牌選舉頒獎禮，又有一批新銳香港名牌出爐。其中元朗一間已有九十九年歷史嘅老餅家取得卓越名牌殊榮，卓妮見善德基金會總理王陳鴛鴦嘅次子王偉樑（Desmond）上台領獎，原來呢間老餅家已於前年底易手，出任行政總裁嘅Desmond笑言，自細食呢間餅家嘅老婆餅大，嗰種味道係其他餅店取代唔到，所以唔捨得睇住佢消失，明年一百周年仲要大搞添！
Desmond話，依家正進行品牌重新設計包裝，未來會開更多專門店。Desmond嘅大嫂韓沂彤都喺餅家幫手，相信年輕人嘅新思維好快就可以為百年老店注入新活力，省靚個招牌。
黃家和去八鄉搵隱世啡王
講開元朗美食，品牌局主席黃家和（Simon）都好鍾意去元朗搜羅地道美食，每星期總要去一、兩次。佢話每次想飲港式咖啡，就會專程開車到八鄉近石崗附近搵「隱世啡王」文哥。點解唔係「隱世金茶王」？Simon笑笑口話，因為自己鍾意飲咖啡同埋鴛鴦，所以封佢做「啡王」，其實文哥嗰杯奶茶都好好飲，佢仲勸文哥參加金茶王比賽，但係佢極有個性兼怕醜，勸咗三年都唔肯制喎！
杭州旅港同鄉會常務副會長沈墨寧旗下陀飛輪錶品牌都取得香港名牌，創立八年時間即取得咁好成績，真係恭喜晒。不過佢嘆生意難做，因為競爭大，又要不時創新，依家做得最好嘅反而係日本市場。
香港金銀首飾工商總會榮譽會長陳瑞群嘅珠寶店亦躋身香港名牌，佢笑稱以街坊生意為主，唔恨賺自由行客嘅錢，做生意最緊要穩紮穩打咁話。
卓妮