政情：財神蔣東強同長者拜年
唔少立法會議員同埋區議員都好鍾意趁大時大節，整古做怪咁去氹吓街坊開心。咪以為只有議員先會咁做，前日趁住大年初五，中電總裁蔣東強就扮財神去同班老人家拜年。財神爺通常都係派吓利是，不過蔣東強就派咗大大個嘅福袋，唔知入面有啲乜嘢呢？
自製賀年黃金球 食得健康
除咗派福袋，佢仲同老人家一齊整吓賀年食品應節。傳統年糕、蘿蔔糕呢啲賀年食品食落就好好味，但係對健康冇乜益處。蔣東強就用啲果仁同埋乾果整咗一款「賀年黃金球」，寓意係「金銀滿屋」。睇真啲，又真係好似係健康版嘅煎堆，咁老人家食幾多都唔怕啦！