政情：鄭若驊惡運十年 佗衰家早走早着
新一屆特衰政府官員上任以來不斷出醜甩轆，特別係「放生黎智英、唔告梁振英」而被各界炮轟嘅律政司司長鄭若驊，民望長期包尾「墊司底」，甚至「墊官底」。香港術數家協會術數師楊子東批算，鄭若驊今年十一月生日之後，將開始行十年衰運，一日在任司長，恐隨時連累港人。至於部分高官運勢亦「未見最低，只有更低」，其中商務及經濟發展局局長邱騰華要注意心臟健康。
一九五八年十一月出生的鄭若驊，今年生日後將踏入六十一至七十歲的丙辰運，楊師傅指鄭呢十年將會步入衰運期，形容佢進入人生「噩夢」，其中以二○二○年最兇險，處理不好就成個十年都毀咗。此外，鄭若驊忌金水，「大水」的豬年亦對佢極為不利，意味鄭嘅衰運其實由豬年立春後已開始。
小修小補 醜聞或不了了之
楊師傅亦為深陷多宗醜聞嘅鄭若驊的官途起卦，主、互及變卦分別得出「地火明夷」、「雷水解」及「地雷復」，三支卦代表鄭嘅醜聞或官運演變過程。楊師傅解釋，主卦「地火明夷」意指有少少曙光；互卦「雷水解」指她最終獲較年長嘅男人幫忙解困；變卦「地雷復」指有人為她的醜聞小修小補遮醜；而「地火明夷」及「地雷復」兩卦都顯得天色昏暗，意味鄭嘅醜聞可能會以不了了之嘅形式結束。
張建宗白忙 邱騰華易生病
至於其他高官，楊師傅特別提醒邱騰華要小心健康，因為邱喺農曆七至八月會遇上三合水局，極大機會出現健康問題，而佢面相為下三白眼，易有心臟病，建議佢最好提前做好身體檢查。同樣在豬年運氣欠奉嘅發展局局長黃偉綸，八字忌金水，農曆四月要特別注意交通意外，駕車時要小心掉頭或爬頭動作，冬季亦要顧好身體。
此外，好鍾意返工嘅政務司司長張建宗喺豬年恐怕得個忙字，全年政績平凡無奇；而財政司司長陳茂波就官殺大旺，工作壓力加重，捱得過就民望上升，失敗不但賠上名聲，仲隨時健康受損。眾多高官之中，負面新聞不絕嘅運輸及房屋局局長陳帆，下半年入冬後運氣會變得唔錯，但就要小心腸胃嘅健康。都係嗰句啦，風水命理同八字批算係想幫人趨吉避凶，信則有、不信則無，毋須太上心。