中環出更：柯創盛百無禁忌 年初三捐血找數
尋日係大年初六，立法會議員柯創盛（柯仔）一身螢光綠賀年裝示人，帶同九龍東部分區議員及社區幹事搞新春財神巡遊。着到咁搶眼，柯仔就話螢光綠係佢最愛，件衫更係螢光粉紅色底，可以反轉再反轉咁着，夠晒環保兼包唔撞色喎！不過佢就自爆為咗「找數」，大年初三有「血光之災」啊！
新正頭見血咁嚇人？柯仔就笑住話「百無禁忌」，其實係上月底作感冒喺立法會捐血被「DQ」，所以毫不避忌揀年初三去觀塘捐血站捐血「找數」，但竟然多人過平日捐，等咗起碼一個鐘，捐出嘅血量更係佢人生最多嘅一次，認真「大出血」。
慨嘆今年冇乜賀年氣氛
唔止找數，柯仔更係典型工作狂，今年只有年初一放假，年初二已開始不停落區同街坊拜年，夜晚就陪太太返娘家食開年飯，食咗唔少家鄉潮州菜，包括滷水鵝、韮菜粿及湯圓等。咁有冇肥咗？佢就摸住個肚話「未」，之後就唔知嘞。佢慨嘆今年冇乜賀年氣氛，如果唔搞吓社區活動，請人舞獅或唱歌等，市面可能會水盡鵝飛喎！
卓妮