政情：車身製造廠扎根數十載 吳家榮堅持香港製造
外界成日話香港冇工業，大家有冇諗過周街行嘅旅遊巴、邨巴或校巴之中，竟然有一半係香港本地設計及製造？中華廠商聯合會會董吳家榮（Eric）做車身製造廠幾十年，依家喺內地都有廠，不過佢刻意保留喺落馬洲嘅車廠，就算地方有限，未能做到太多自動化工序，但係佢仍然好堅持香港設計、香港製造，笑言係一種信念咁話。
Eric話，香港其實仍有三個本地品牌車廠，佢間廠雖然產量唔多，但勝在質素高。佢話內地車廠嘅自動化比例高啲，一架旅遊巴售價大約一百三十萬元，但香港車廠幾乎九成係靠人手，一架車要賣一百八十萬元，雖然價錢貴啲，但係唔少本地客都唔介意買本地貨，起碼維修保養都容易啲，一坐上去嘅感覺都唔同，所以佢間香港車廠就專做貴價車喇。
佢笑笑口話，咁做係因為自己有一個理念，就係堅持有香港設計、香港製造嘅工業，聽落真係幾抵讚喎！