政情：鍾樹根掉低老婆 睇加州參議員宣誓
前立法會議員鍾樹根早前喺社交網站上載一張同加州參議員Bob Archuleta嘅合照，原來佢親身抵達美國出席Bob Archuleta喺加州舉行嘅宣誓儀式，樹根話對方係佢朋友嘅死黨，兩人相識咗兩、三年，咁啱自己要去美國考察，所以順道去見證朋友宣誓。
講起今次美國考察行程，樹根話呢次係首次到美國睇農業，分別會到三藩市等多個地方，若然時間許可會去埋硅谷睇創新科技，由於今次行程多多，所以就冇帶埋太太隨行嘞。
主要考察美國農業
樹根又話，今次考察主要係想睇美國嘅種子同肥料，睇吓有冇乜品種適合引入內地，事關佢依家搞開輔助農業，包括幫人改良土地、化肥、農藥等，分別喺河南、東北、廣東等都有自己嘅團隊。話時話，樹根冇做議員只係兩年多時間，成日都做「空中飛人」周圍去，似乎轉換跑道後做得甚為有聲有色！