政情：術數師：高官運滯施政不濟 農曆九月恐社會動盪
特衰政府施政瓣瓣衰，由大型基建至民生補助無不甩轆「吸嬲」，高官就有理無理高薪厚祿照「吸財」，究竟廣大市民豬年有冇運行？抑或繼續被呢個無能政府連累呢？本報今年繼續請來香港術數家協會術數師楊子東，以立春八字分析本港豬年運程，佢話今年官星無力，特別是農曆九月政局不穩，社會動盪；又指豬屬水，火土無力下，港人要小心樓市波動，以及小心交通意外。
楊師傅話，豬年的立春八字為己亥年、丙寅月、任申日、丙午時，而八字之中只有「己」屬土，代表政府的官星，但遇着屬水的「亥」，令官星無力。去到農曆九月為甲戌月，屬土，而該月三碧入中宮，三碧星屬是非星，主是非及鬥爭，當三碧強「木」克制甲戌月嘅「土」，對政府形勢極為不利。
唔單止咁，特首林鄭月娥八字屬「從勢格」，用神為「金」，在農曆九月會被「土」埋及被「木」克洩，施政發揮不到效用，加上政務司司長張建宗及財政司司長陳茂波的八字用神均為「土」，運輸及房屋局局長陳帆八字用神則為「金、水」，三人在該月同樣會被「木」克洩，所以該月對政府及高官好不利，恐導致政局不穩，社會動盪，適逢該月 （新曆十月）通常係林鄭發表新一份施政報告，睇怕市民要自求多福。
樓市料大波動 上車需留神
楊師傅話，豬年屬「大水」年，樓市將有大波動，佢指近年大熱嘅納米樓將成重災區，整體跌幅或高達三成，呼籲欲上車嘅市民要考慮清楚。至於四百呎以上嘅單位及豪宅，影響會較輕微；佢又提到農曆二月會較多踢契及銀主盤等負面消息，而農曆正月及十月較有利西南區樓盤。
有利小本創業 飲食業最旺
至於股市方面，楊師傅指「大水」對股市影響較輕微，其中農曆三月最有利大眾小戶。講到創業，佢話今年利小本經營創業，其中食神生財，飲食業最旺，換言之開車仔麵檔或小食店就最旺喇。
不過，楊師傅特別提醒，豬年要小心交通意外，尤其是犯太歲嘅屬豬人士，農曆四月及十月不論駕駛或搭車都要萬分小心；其次係疫症疾病。今年去旅行都要注意，農曆六月東南方易有大型山火、地震或火山等災難。不過，信則有、不信則無，無論好壞都毋須太上心。