中環出更：蔣麗芸豪派金豬 鼓勵小孩儲蓄
豬年新正頭，唔少立法會議員都會以「豬」搞搞新意思，民建聯議員蔣麗芸（Ann）就趁新春帶埋「豬仔」同大家拜年。佢介紹呢種粉紅豬共有四百隻，另加四百隻金色豬，全部都係錢罌，打算年初七「人日」派畀九龍西嘅學童。Ann話，派豬錢罌係希望小朋友承諾儲利是錢，同時會畀佢哋寫下願望，佢會揀幾十個願望幫小朋友實現。如果小朋友嘅願望係買樓咁點算呢？佢就話送隻大啲嘅豬畀小朋友儲錢喎。
是否參選 仍未定案
被問到點睇下屆立法會九龍西選舉，Ann就話該黨希望出兩隊，但最大嘅對手係同區黨友鄭泳舜，因為要解釋畀選民聽點樣分開投票並非易事，若以二○一六年選舉得票嚟睇，如果同路人畀多少少，應該夠贏兩席。不過Ann補充，派邊個出選、佢係咪有份參選，目前還未有定案。咁點睇同區嘅陳凱欣應否再參選呢？佢就話支持任何想參選嘅人，對於近日有傳陳凱欣或重返政府做副局長，Ann就大讚做副局長福利多。