中環出更：鄔翁嘉穗選港姐夜半古裝被當鬼
唔少善團搞活動都諗啲新意思，東華三院早前舉辦一百四十八周年慈善晚宴籌款，請咗好多小丑、雜技員、魔術師等嚟表演，場面相當熱鬧，睇見表演團體悉心裝扮、造型出眾，東華三院總理鄔翁嘉穗（Virginia）就講起以前參選港姐期間，其中一日排練到凌晨兩三點，個人攰到爆，想去廁所嘅時候，突然有人尖叫然後逃跑，Virginia先醒起自己着緊全身白色嘅古裝衫，加上佢雙目無神咁行，相信有人見到佢以為係「撞鬼」喇！
Virginia話，細個喺加拿大讀書時，萬聖節化晒妝出街玩，都冇嚇親人，反而選港姐期間嘅嗰次經歷，就係意料之外，更尷尬嘅係對方走得實在太快，Virginia根本唔知道係邊個，想解釋番「其實我係人嚟」都冇機會呀！
香港中華總商會副會長楊華勇（Johnny）同太太莊菲娜對角色扮演都有鋪癮，佢哋話自從大女出世起，每年萬聖節都會一齊裝扮下，試過扮海盜等，舊年就扮咗「超人特攻隊」入面嘅角色，事關自從細仔喺前年底出世後，一家五口就同電影入面嘅家庭成員數目相同，仲要一樣係一個大女、兩個細仔，大女扮起上嚟仲特別投入添。
蔡榮星鍾意扮靚多啲
晚宴籌委會主席蔡榮星都話自己鍾意「扮」，不過就係「扮」靚居多，佢成日都會買衫，試過着到全身五顏六色o架！佢話，買多啲就比較容易迎合不同場合，例如出席新年活動都會着番中國傳統服飾，但就未試過扮財神嘞，反而叫其他人扮財神，送啲錢畀佢咁話！認真搞笑！
卓妮