政情：區鎮樺派白鴿黨揮春 惹翻啅疑雲
明天就係農曆大年初一，無論係立法會議員定係區議員，呢排都頻頻落區派揮春。上年十二月中高調退出民主黨（白鴿黨）嘅大埔區議員區鎮樺，被發現所派發嘅揮春印有白鴿黨黨徽及舊黨友，唔通佢又入番黨？
落區仲用有黨徽宣傳品
按讀者提供嘅相片，區派發嘅揮春印咗佢同埋四位已退黨嘅社區主任名字，現任白鴿黨立法會議員涂謹申同鄺俊宇亦喺其中。區就解釋話揮春早已印好，唔想浪費所以先繼續派發。佢仲自爆唔單止揮春，早排派發工作報告同埋月曆都係喺退黨前印製，有街坊問起，佢如實告之，近日就冇乜人問喇，相信影響唔大。
據悉區鎮樺喺退黨之後，落區時都仲用印有白鴿黨名同埋黨徽嘅橫額同易拉架，不過近日就遮番晒喇。雖然話環保好重要，不過既然退咗黨，就應該劃清楚界線，以免引人誤會。