政情:話以訛傳訛成常態 羅致光失策搵嘢賴

近日因收緊長者綜援申請受外界抨擊的勞工及福利局局長羅致光,尋日化身鍵盤戰士,喺網誌大談「以訛傳訛」,話喺現實生活係常態,差不多每天都喺社交媒體收到以訛傳訛嘅訊息,令人爆笑、驚嚇或憤怒,澄清報道罕有人關注。又話自己並非想澄清啲咩,澄清易被視為死撐,更會被愈描愈黑。勞工界立法會議員何啟明同社福界議員邵家臻都認為,呢篇網誌同近日收緊長者綜援申請風波有關,何啟明批評佢明顯想賴社交媒體同傳媒,「衰咗就衰咗啦,錯應該要認啦,仲講」,邵家臻就叫羅致光唔好再撩是鬥非。

羅致光喺網誌聲稱「不談政治,不談政策」,討論與新年有關嘅「以訛傳訛」,舉了數個例子,包括「一元復始」同「三陽啟泰」其實與舊曆新年無關係。佢又提到日常生活有好多由「以訛傳訛」而產生嘅所謂「普通常識」,或者係「習非成是」,社交媒體更加係「以訛傳訛」嘅促進者,令人有情緒反應,因此有興趣閱讀及廣泛流傳,人們一般不會深究真偽就立時轉貼,即使後來有澄清報道,但當「說穿」就失去興趣,澄清報道罕有人關注,更不會流傳。

何啟明籲接地氣 勿閉門造車

何啟明認為,羅致光提出「中年論」同「扣錢論」後,或以為市民不清楚政策內情而抹黑他,其實佢可能到依家仍未明白,整件綜援事件令市民憤怒嘅係政府不尊重長者嘅印象,「可能佢智力太高,對凡人唔理解」,任何政治人物都應該知道,「醜事傳千里,好事冇人知」,所以不應犯錯,羅致光依家嘅說法,明顯想賴社交媒體和傳媒,但要記住「一隻手指指人,四隻手指指自己」,呼籲羅致光應「接地氣」,多聽民意,政策讓普通人聽得明,切勿閉門造車。

邵家臻勸言唔好再撩是鬥非

邵家臻亦認為,羅提到「以訛傳訛」係別有所指,例如近日「中年論」,羅其後澄清六十歲係中間,「到底係澄清定補飛,係說錯了話定說漏了嘴」,無論如何,羅致光都將長者年齡重新定義。而另一個所謂嘅「以訛傳訛」或與早前曾有傳收緊長者綜援或研設過渡期,其後羅致光卻聲稱是謠言有關,但相信當局其時係測試外界反應,其後就稱別人「亂吹」。而整個綜援風波,歸根究柢都係因為當局喺一開始時,無推出整套計劃,事先又未有諮詢社福界等夥伴嘅意見,唔聽民意,叫羅致光唔好再撩是鬥非咁話。

講真嗰句,綜援風波不斷,多少同羅致光多次失言有關,如果做政治工作,一言一行唔事先評估民間反應,最終後果都係自己承受,無得怨人。

第一手消息請下載on.cc東網iPhone/iPad/Android/Windows Phone Apps