政府補鑊推出派四千蚊嘅關愛共享計劃，早前派表即甩轆鬧「表格荒」，財經事務及庫務局局長劉怡翔尋日仲死撐，其中一個理由係冇諗過有人包括區議員會索取多份表格再派畀街坊。老實講，班區議員預先同當局講咗話要幾多表格，當日攞番嚟嘅表格唔夠數不特止，仲要喺地辦印到影印機都壞埋，班區議員幫政府補鑊，劉怡翔反而卸鑊賴班議員，做官冇膊頭去承擔責任，肯定畀啲區議員鬧爆喇！
