政情：朱凱廸又想拉布 被斥狐狸露尾
立法會工務小組委員會尋日開會，通過綑綁逾萬個工程的基本工程儲備基金，合共涉款近一百五十億元，項目將提交財務委員會審議。期間議員朱凱廸又想拉布，提出中止待續，最終被否決。工聯會議員何啟明不點名形容佢係「狐狸要露出尾巴」，提出動議係想拖垮其他冇爭議嘅工程，更批評委員會主席盧偉國畀民主派喺三次會議上拉布。
尋日已經係工務小組第三次討論有關撥款項目，朱凱廸喺會議開始時提出中止待續，朱指現有嘅基本工程儲備基金撥款機制有漏洞，喺收地同特惠津貼嘅撥款分目方面冇設上限，綑綁審議係削弱立法會嘅監察功能，跟住又話項目內嘅新界東北發展計劃收地賠償涉及一百三十三億元，打破有紀錄以來嘅最高單項賠償，因此建議應該分開審議。