政情：海報撞樣 陳恒鑌轟白鴿黨抄襲

民建聯喺社交網站貼出該黨葵青支部於一月九日喺網上發布嘅最新長者福利一覽表截圖，同林紹輝及劉貴梅嘅海報比較，又hashtag指「唔好以為整走logo就得」同「張圖我們整化左（咗）灰都認得」。

林紹輝同劉貴梅嘅海報與民建聯圖表上嘅公仔、排版同文字內容被指相當類同，而該海報喺同款圖表上方，加上林紹輝同劉貴梅嘅相片及小量文字。

林紹輝認疏忽願撤回

林紹輝回覆話自己同職員都收到保險經紀傳來有關圖片，該圖片未有政黨標誌，自己用以製作宣傳品只因為希望畀更多長者知道有關資訊，承認疏忽，未有查證圖片來源就輕率處理，直至該黨問佢先知道呢件事，責任在於自己，願意撤回有關宣傳品。

民建聯立法會議員陳恒鑌聯同該區社區主任郭玲麗、張燁媚尋日下晝召開記招交代事件，重申該黨早已採用有關設計，批林紹輝態度不能接受，將就呢次疑涉抄襲事件去信白鴿黨紀律委員會，要求該黨嚴肅處理事件，正視其黨員「死口不認錯」嘅行徑，強調若白鴿黨處理方法唔理想，唔排除會採取其他行動跟進。