政情：李卓人補選使179萬 未清宣傳品收告票
曾捲入「黑金醜聞」兼重返議會失敗嘅工黨李卓人，舊年參加立法會九龍西補選總開支約一百七十九萬元，按其獲得約九萬三千票，平均每票約十九元三毫。不過，佢冇手尾未清理宣傳品，食環署發出七張告票，至少幫佢拆咗三塊宣傳板、兩條橫額、三十支直幡同二十一張海報，另有兩張「牛肉乾」，合共罰款近七千元。
落敗仍大搞慰勞宴
此外，李卓人收咗約九十七萬元捐贈，當中以工黨同職工盟捐最多，分別為五十萬元及二十萬元。雖然佢落敗，但仍大搞慰勞宴，仲揀正喺選舉後一個月、聖誕節正日舉行，有一百人出席，淨係叫到會都使五千元添！
至於被「二度DQ」嘅劉小麗冇得選都要使七十萬元，但就喺多個渠道籌得約四十七萬元幫補。無獨有偶，連佢都有搞慰勞宴，但就早喺十二月頭搞，廣邀八十人出席，花三千六百元叫到會。