政情：葉建源索TSA數據 楊潤雄拒回答議員聯署怒插
現屆政府上任時提出增加五十億元撥款，大幅增加教育資源，令到立法會教育界議員葉建源非常之冧，更對施政報告致謝議案投下贊成票，成為泛民嘅少數。不過，蜜月期已經過咗，葉建源尋日更嬲到搞聯署，鬧爆教育局局長楊潤雄！
小三全港性系統評估（TSA）過去爭議不斷，曾因過度操練嘅疑慮而一度暫緩，最終喺舊年以不記名、不記校、不收報告同抽樣方式進行。葉建源尋日就提出相關嘅口頭質詢，要求楊潤雄提交有幾多間學校申請全級評估同學生數目等資料。
但楊潤雄就一口拒絕，解釋話教育局避免畀人誤會向學校施壓，唔會向考評局查詢，仲話面對不願公開與政策實施無關嘅數據時會感到好無奈喎。佢更講到，如果公開數據不排除畀人自行解讀，會為學校帶來不必要嘅壓力囉。
葉建源就話唔明白呢啲數字有乜嘢機密，直指政府有憲制責任去回答議員嘅質詢，質疑教育局係咪漠視呢個基本憲制責任，拒絕向立法會負責，講明係「是可忍，孰不可忍」。點知楊潤雄就話葉建源「太過上綱上線」，重申參與嘅學校數目與政策無關，冇原因強迫考評局作違背政策原因嘅動作。
批只顧學校 漠視學生壓力
楊潤雄呢番說話當時已經激起議員不滿，有泛民議員批評政府只顧學校壓力，唔理學生壓力，而政府拒絕提交數據亦有欠透明度，大嘆「乜嘢政府嚟(口架)」。至於建制派議員亦有幫口，表明立法會議員有責任發問，官員唔能夠批評問題。最終楊潤雄都有認衰，話如果有議員感到冒犯會致歉，重申尊重議員發問權利，作為問責官員有責任向議員解釋同作答。
之不過，葉建源並未收貨，更聯同其餘二十三名泛民議員聯署去信政務司司長張建宗，表達對楊潤雄喺會議上答覆嘅不滿，信中提及楊潤雄批評議員「太過上綱上線」外，仲批評楊潤雄敷衍回覆，要表達強烈不滿，仲講到政策局成日以主觀理由拒絕向立法會同公眾提供資料，違反咗政府公開資料同開放數據嘅原則，又漠視咗回應立法會質詢嘅基本憲制責任，對此深表遺憾，直言楊潤雄表現同拒絕提交資料都係不能接受囉！