中環出更：柯仔 莫乃光 捐血被DQ

柯仔同莫乃光同樣都係填晒表，做埋基本測試先被DQ。柯仔就話咳咗兩三日以為冇大礙，點知護士就話佢感冒啱啱起，安全起見而唔畀佢捐囉。佢就話每年都會去捐兩至三次血，現時惟有等下星期病愈再去捐血站，但下星期正值農曆新年，唔通佢打算新正頭就大出血？

至於莫乃光就因為月初喺泰國返港，而捐血規定外地返港要隔二十八日先可以捐血，偏偏只差一日先夠期囉，不過佢就話立法會將喺四月份再辦捐血日，到時就會再去捐，而佢嘅血型係AB型，只有AB血型嘅人啱用，所以佢更自嘲孤寒添！

莫乃光只差一日先能夠捐血。（徐家浩攝）

陳維安（右）有陳沛然（左）陪住捐血，直言夠安心。

陳維安籲外遊前好去定

立法會秘書長陳維安捐血時就撞正醫學界陳沛然同行，見到有醫生陪住，陳維安即刻大呼安心。佢哋兩個同樣係O型血，但陳維安話自己係素食者，血脂比較少，仲話放假後血庫會有缺血情況，而且外遊後又要隔離一段時間先捐得，所以就呼籲捐血者應該放假前去捐血。

金融界議員陳振英亦有去捐血，話大學時受同輩壓力而首次捐血，之後都有維持捐血習慣，不過隨住工作忙碌，連周末都要加班，整個捐血站開放時間都撞正要工作。佢就話有呼籲辦事處同事參加捐血日，點知有兩個同事長期服藥，所以有心都捐唔到血，至於女同事就擔心捐血後會頭暈而婉拒咗。

卓妮