中環出更：食餐飯傾吓偈 王志民邀全體立會議員團拜
中聯辦尋日舉辦新春酒會，主任王志民致詞時就講到中聯辦嘅大門愈開愈大，更公開邀請包括全體立法會議員在內參加春茗團拜，直言「食餐飯，傾吓偈」。
其實王志民舊年出席立法會午宴時，已講過回請全體立法會議員，而尋日王志民又公開邀請特區政府同各界人士，點名講明包括全體立法會議員，話趁呢個時節到中聯辦參加春茗團拜，仲話係禮尚往來，善意溝通，要不斷增進了解同積累共識，共同建設香港繁榮穩定同長治久安嘅美好家園。
重申中聯辦同市民「行埋一齊」
佢又講到中聯辦並唔神秘，好似大家嘅老朋友、好朋友，重申會同大家及全港七百四十萬名市民「行埋一齊」，而過去一年參加清理颱風損毀等活動同工作，都展示出中聯辦植根、融入同服務香港。
佢又話舊年香港社會形勢有明顯變化，係「風更清、氣更正、人心更齊」嘅一年，相信香港會繼續堅守一國之本，善用兩制之利，從中獲得更多安全感同幸福感。
卓妮