中環出更：重視老夥計資歷 王庭聰撐65歲退休
呢排社會上爭論緊幾多歲先係退休年齡，卓妮早前喺一個活動上遇到香港工商總會主席王庭聰，佢話只要健康狀況良好，退休年齡不妨由六十歲延至六十五歲，而佢自己亦打算六十五歲先至退休。
王庭聰話自己公司同好多企業一樣，以六十歲為退休界線，但鑑於現代人生活條件改善，老員工嘅資歷又相當可貴，所以年屆花甲嘅員工只要身體狀況許可，可以用每年續約嘅形式，繼續為公司服務，而事實上佢公司亦仍然僱用唔少年過六十歲嘅資深員工。然而再鋒利嘅寶刀，始終都有生銹嘅一日，延長退休終須有個期限，佢認為做到六十五歲就一定要退下崗位，唔好阻住後浪出來打拚。況且趁住機能尚可嘅體魄享受退休生活，先至不枉此生。
政府早前公布喺二月一日起收緊長者綜援申請門檻，卓妮早前喺九龍樂善堂第三間社企「樂善復康站」開幕，問到政府咁做係咪變相將責任推比慈善機構呢？樂善堂總理陳健平唔評論政府點諗，話「做善團嘅一向都會盡做」！仲話除咗喺經濟上嘅幫助，其實搵番啲啱老友記用嘅日用品都好重要。
政府收緊長者綜援 羅蘭姐費解
嘉賓兼都係「老友記」嘅羅蘭姐，當日披住件由理大畢業生特意設計畀老友記嘅防水防菌保暖披肩，佢大讚夠時髦又好實用，話科技進步都冇忘記啲長者，但講到政府收緊長者綜援申請門檻嘅做法，佢就表示費解，話見到街外好多清潔工 「朝早見佢掃完，夜晚又係見同一人繼續掃，但其實佢哋好多老到腰都伸唔直，相信佢哋唔係為興趣啩，點解年紀咁大咁辛苦都唔幫吓佢哋，仲要削減佢哋嘅福利呢？」
卓妮