政情：法援局開會 王惠貞出席率包尾
立法會大小會議都不時有官員或者議員缺席，其實公職部門又何嘗唔係咁呢？好似只有九名成員嘅法律援助服務局咁，喺一七至一八年，原本只係召開六次會議，但係都有一次因出席人數未達法定要求而流會；更甚者係，成員之一嘅中華總商會副會長王惠貞（Connie），五次會議之中只出席一次，出席率奇低，敬陪末座。
稱撞正公幹及生病
Connie接受查詢時承認出席率差強人意，佢解釋每次會議都有寫喺行程上，但係幾次都撞啱要去公幹，有一次就因為病咗，佢都覺得唔好意思。
近年Connie喺商界同建制派嘅社團圈子好活躍，除咗去年升呢做中總副會長之外，亦係九龍社團聯會理事長、港區婦聯代表聯誼會會長、香港義工聯盟常務副主席等等，分身不暇都難怪嘅。法援局成員任期為兩年，上年九月一日上任嘅Connie，唔知下年仲得唔得閒續任呢？