政情：手術後變鴛鴦眼 黃碧雲話有辣有唔辣
立法會議員黃碧雲維持咗四眼形象多年，但去年做完眼部手術後已經告別眼鏡，不過咪以為佢已經冇晒近視，因為當時只有右眼因眼疾而接受手術，間接令右眼冇咗近視，但左眼仍然有深近視，所以最終變咗鴛鴦眼。
黃碧雲話，手術後右眼只剩下約一百五十度近視而毋須再用眼鏡，但左眼就維持住六百度近視，而視光師又搵到一款比較濕潤嘅隱形眼鏡，令佢可以克服到眼乾問題，左眼可以嘗試改戴隱形眼鏡。咁會唔會為左眼做埋矯視手術呢？佢就話現時又要開會同教書，暫時未有打算喇。
告別眼鏡 唔夾宣傳品
告別多年嘅眼鏡，但黃碧雲就話有辣有唔辣，好處係買太陽眼鏡夠方便同選擇多，落雨又唔使頻繁抹走眼鏡上嘅雨水，但下廚同食嘢就大咗機會有油或汁彈入眼。現時佢有唔少宣傳品仲係以四眼造型示人，但唔想浪費，會等到宣傳品用晒先逐步換上唔戴眼鏡嘅近照，以新形象示人。