中環出更：試行繞道 黃定光張宇人全程駁火
中環灣仔繞道今日啟用，尋日立法會議員已率先試行一轉，其中民建聯黃定光（象哥）、葛珮帆（EQ）、自由黨張宇人（Tommy）等議員就坐埋同一架車，由中環去灣仔北，再返回立法會，雖然只有短短幾分鐘車程，但車內火藥味甚濃，先有Tommy寸象哥「你哋民建聯鍾意『老點』人」，後有象哥反擊「自由黨冇幽默感」，唔知咩事要搞到兩黨開火呢？
互寸「老點人」「冇幽默感」
話說中環灣仔繞道可以連接東區走廊，直達北角，所以EQ一度以為試行係會去到北角，最後先發現去到灣仔北就折返，相當失望。呢個時候象哥就話EQ上錯車，聲稱有架車係去北角嘅，又有架車去柴灣，一開始EQ都信到十足，後來先意識到象哥係亂噏，搞到Tommy都忍唔住要寸象哥，話「民建聯鍾意『老點』人，仲要『老點』自己人」囉！
不過，象哥都即時反擊，寸「自由黨冇幽默感」，查實Tommy都唔係幫晒EQ，事關EQ發現冇得去北角之際，Tommy都一度叫佢「你今晚搵個司機車你去啦」！好彩最後所有火花都喺笑聲中落幕，估唔到試行都搞到氣氛咁高漲。
卓妮