中環出更：空氣污染頻爆錶鄭敬凱空氣淨化機隨身
今個冬天香港嘅天空經常灰爆，空氣污染指數爆晒燈，流感高峰期又殺到，唔通要孭部空氣清新機出街？早前卓妮喺一個晚宴見到冠忠巴士董事鄭敬凱，真係隨身帶住一個超迷你空氣淨化機。佢笑笑口話，部機掛喺胸前，隨時可淨化自己周圍大約一米左右嘅空氣，帶咗近兩個月感覺唔錯，至少心理壓力冇咁大喎！
鄭敬凱話，帶住部機原本係想防流感，最近霧霾好嚴重，都多咗個幫助。講起空氣污染，佢啱啱喺武漢返嚟，直言當地空氣仲差，要灑水降低懸浮粒子添，所以大家真係要諗辦法改善空氣質素。
博愛醫院前主席蕭成財就話，依家咁嘅形勢，惟有靠空氣清新機打救，佢屋企就長擺兩部。講開又講，做電器生意嘅佢話，最近空氣清新機銷情唔錯，不過佢都笑唔出，事關依家生意難做。例如一部三十三吋電視機，十幾年前賣三萬元，依家二千零蚊已經有交易，所以依家打工就最好啦！
羅競成飲豬肺湯補身
同場仲有葵青區議會主席羅競成及區議員郭芙蓉、香港中華廠商聯合會會長吳宏斌等人。羅競成話，自己夜晚經常行青衣海濱一帶當做運動，一星期行三、四次，每次一個多小時，但係當空氣差時就唔得嘞！咁平時會唔會特別煲啲清肺湯水飲？佢笑稱唔會，不過如果去酒樓食飯，有豬肺湯就一定叫喇！至於鍾意打羽毛球嘅吳宏斌話，對空氣污染冇有怕，照常喺戶外打，仲一個星期打兩次添！佢話本港空氣質素比起其他地方已經好好多喎！
卓妮