政情：施榮懷泰國過熱辣辣新年

Irons話屋企每年都係出國過年，以往就淨係四兄弟同父母一齊去，依家愈嚟愈多人，嚟緊今次撞正啲小朋友放假，會有成廿幾人一齊去。至於點解會揀去泰國，佢話係因為比較近，因為以前去過澳洲黃金海岸，路途遙遠又要轉機，所以屋企人唔太鍾意。

唔少人去泰國都會租住別墅型嘅酒店，今次Irons一家成廿幾人，租住呢類別墅應該好方便。不過，佢就話佢哋今次只會住番酒店，因為比較近市中心，相對地出去玩就方便啲。

帶旅行麻雀畀爸爸過手癮

旅行唔止飲飲食食，Irons仲特登買咗塊麻雀枱墊，再自備埋旅行麻雀，打算到時開枱。佢解釋，因為爸爸鍾意打，所以特登搵塊墊，可以等爸爸旅行期間都過吓手癮喎。