政情：中間派陳沛然又變身 認係民主派
自稱係中間派嘅立法會醫學界議員陳沛然又「變身」，試圖左右逢源？最近港府調高申領長者綜援資格至六十五歲捱轟，民主派議員尋日聯署，要求會見特首商討擱置長者綜援新安排，值得留意嘅係有二十六名民主派議員參與聯署，包括熱血公民鄭松泰，同埋向來自稱中立嘅陳沛然。
之前參與建制聯署被狠批
仲記得喺舊年九月底，陳沛然聯同三十四名建制派議員發聯合聲明，撐政府取締主張港獨嘅民族黨，惹起軒然大波，遭業界狠批佢背離中立原則，唔應該同建制派一齊聯署，唔夠兩日就致歉兼跪低自行退出聲明，之後仲惹嚟建制派微言。經此一役，相信佢應該痛定思痛。
之不過，今次佢再次心口掛住個勇字以民主派牌頭參與聯署，若然再遭業界同網民非議，佢又會唔會極速退出，嚟保住自己中立嘅光環呢？