政情：傳不角逐連任 肥老闆斥誇大
早前有傳聞指立法會金融服務界議員張華峰（肥老闆）將不角逐連任，尋日被問到係咪唔選時，佢就斥有關傳言誇大，同埋有啲選擇性。佢旁邊嘅商界議員林健鋒（Jeffrey）亦即刻幫拖，話「佢係唔選，唔選下屆特首」喎！
林健鋒幫口解圍
肥老闆即賣口乖，大叫Jeffrey做「鋒哥」，話對方係大佬，會好聽對方話喎。咁Jeffrey點睇肥老闆係咪唔選呢？Jeffrey就話「天機不可洩漏」，適當時候就會公布消息咁話。肥老闆都即刻和應，話適當時候就會講喇！
Jeffrey仲扯到中美貿易糾紛及英國脫歐，話美國總統特朗普近月來嘅每句說話，都可能會引發金融市場動盪。肥老闆就即刻話「鋒哥講嘅嘢都會引起市場波動」。咁又係呀，Jeffrey係行政會議成員嚟o架嘛！Jeffrey即刻話要市場穩定，唔可以一波未平，一波又起喎！