中環出更:羅致光中年論 卿姐㷫爆鬧冇腦

政府收緊長者綜援申領門檻,由六十歲提高到六十五歲而激起民憤,曾被譽為民主黨(白鴿黨)「大腦」的勞工及福利局局長羅致光,日前更爆金句話:「如果人人一百二十歲,六十歲都只係中年」遭全城非議。白鴿黨前主席劉慧卿(卿姐)尋日就同羅致光劃清界線,直言「(佢)可能變咗冇腦」喎!

90歲先係長者「離晒大譜」

卿姐喺網台節目上同民建聯(民記)副主席陳勇對話,笑稱按羅的說法,現年四十九歲的陳勇都係「幼年」,陳則大讚六十六歲的卿姐係活力「中年」。陳又話,該黨希望爭取對長者多啲照顧,反問卿姐點睇白鴿黨前「大腦」羅致光嘅做法。卿姐即稱「可能變咗冇腦」,如果九十歲先係長者,真係「離晒大譜」。

卿姐就問陳勇,有指官員唔肯見建制派,係咪有咁嘅事?陳反問,羅致光係咪成日見白鴿黨?直言依家冇話奉旨啲票係自己嘅,該黨唔係百分百必須支持,有時都會反對政府喎!另外,早前陳曾經受訪批評卿姐出任該黨國際事務委員會主席,做法如不肖子勾結黑勢力,卿姐就澄清自己冇叫過外國制裁香港,着陳唔好再拉埋嚟講。

卓妮

第一手消息請下載on.cc東網iPhone/iPad/Android/Windows Phone Apps