中環出更：任委員會主席 麥美娟代容海恩出頭 反歧視母乳餵哺
政府正修訂多條歧視條例，當中明文禁止基於餵哺母乳嘅直接及間接歧視，條例關注嘅問題對懷孕中嘅立法會議員容海恩可以話非常貼身，難怪佢都有加入相關法案委員會。不過佢就唔係做正、副主席呢啲吃力崗位，而係落入兩名女性議員身上，其中主席更加由容出嫁時做姊妹嘅麥美娟出任，睇嚟麥可以名正言順代好姊妹出頭喇！
葛珮帆做副主席
負責審議有關條例嘅《2018年歧視法例 （ 雜項修訂 ） 條例草案》委員會尋日召開首次會議，需要選出正副主席。雖然條例與容海恩好密切，但擔任主席工作量唔輕，而且佢又將於今個月尾臨盆，所以唔搵佢出任正、副主席都好正常。泛民主派派出法律界郭榮鏗應戰，而建制派方面就派出麥美娟及葛珮帆，最終後兩者分別出任正、副主席。
選副主席期間，陳志全就發現好大機會由兩位女性話事喎，麥美娟笑住反問佢點解唔可以，話呢啲算係偏見，講笑話委員會要處理下呢啲歧視問題喇！結果真係選出兩名女性揸旗去關注婦女關心嘅議題，其實都唔錯吖！
另外，立法會建築、測量、都市規劃及園境界議員謝偉銓去年初重返議會後，尋日終於有「零的突破」，出任《消防安全（工業建築物）條例草案》委員會主席。
卓妮