中環出更：傳呼機時代倘告終 用家梁智鴻：到時先算
資訊科技推陳出新，曾經風靡一時嘅傳呼機日漸式微，日本最後一個傳呼台將於今年停止運作，現時本港傳呼機用戶都愈嚟愈少，唔知用家們擔唔擔心冇得用呢？早前卓妮喺馬場見到泌尿科專科醫生梁智鴻，佢笑笑口話幾十年來都係傳呼機嘅忠實用戶，如果傳呼機敵唔過時代而消失，係無可奈何嘅事，惟有到時先至算。
梁智鴻話，目前香港嘅傳呼台只剩一個，因少人使用而停止營運唔係冇可能。目前醫生係本港傳呼機嘅主要用家之一，佢話傳呼機嘅接收能力好强，啱晒佢哋喺醫院穿梭時使用。
陳正欣認為秘書台仍有需求
保良局副主席陳正欣同太太及兩個女兒都有入場，陳正欣都曾經係傳呼機嘅用戶，但當手提電話問世後，佢部傳呼機就被打入咗冷宮，依家更不知所終。佢憶述使用智能手機之初，好多人仍然使用傳統手機，於是電訊商就提供類似秘書台嘅服務，將來電者嘅口訊以文字方式傳送至佢部手機。佢話由於港人愛用嘅手機通訊程式喺內地並唔通行，而呢種服務就有突破限制嘅優勢，所以就算傳呼機消失，相信呢種類似秘書台嘅服務應可維持一段時間。
港九電器商聯會主席蒙德揚就親身目睹傳呼行業盛衰，事關上世紀八十年代，佢曾同本地電訊商合作生產傳呼機。佢話早期傳呼機嘅訊息係以數字顯示，後期進展至顯示文字訊息，用戶毋須再為解讀數字所代表嘅內容而攜帶密碼卡。傳呼時代終結固然令人惋惜，但只能嘆一句大勢所趨。
卓妮