政情：蕭煒忠遺傳患痛風 胡綽謙虛驚一場
隨住年紀增長，病痛都會多啲。馬主協會理事蕭煒忠同大埔區議會增選委員胡綽謙早前喺一個茶敍活動見面，兩個講起健康問題。兩人未到中年竟然已經有痛風問題，不過其中一人只係誤以為自己有痛風，認真蝦碌。
蕭煒忠話，佢嘅痛風係遺傳，廿幾歲時已經受痛風問題困擾，所以一直以來飲食方面都好節制，例如只飲小量嘅酒，連花生都唔食。不過點節制都避唔過痛風發作，之前仲痛到連元旦都要入醫院打針同坐輪椅。佢就話，好彩唔係農曆新年出事，唔使避忌唔去求醫。不過佢依家隻右腳依然又痛又腫，行路都一拐一拐，車都揸唔到。
撞到枱角 以為中招
至於胡綽謙就自己嚇自己喇。佢話聖誕期間去咗唔少派對，食得多海鮮又飲酒，一覺醒來腳趾尾好痛，搞到以為自己「中招」，直到隔咗幾日，痛楚減輕，先醒起腳趾尾曾經撞到枱角，所以同痛風完全無關。不過經過今次虛驚一場，相信佢都會開始注意飲食喇。