政情:息影女星之子韓世灝 任新民黨副主席

建制派政黨新民黨尋日宣布委任韓世灝做副主席,原來韓世灝係息影女星汪玲嘅長子,佢亦曾做過樂善堂主席。該黨主席葉劉淑儀透露,韓早喺二○一一年已加入,係資深黨員,仲讚揚佢有領導同商業才能,經常往返世界各地,相信佢可以幫手壯大新民黨。

會用國際人脈助政黨發展

目前新民黨副主席有公民力量召集人潘國山同立法會議員容海恩,加埋韓世灝就由二人增加至三人,未知具體分工上會有乜嘢改變,但韓就話會善用佢多年跨國營商同投資經驗、國際人脈同宏觀國際視野等去幫新民黨發展咁話。

據介紹,韓世灝十三歲就去到英國讀書,喺英國倫敦大學國王學院畢業,擁有劍橋大學休斯學院精神病學博士學位。此外,佢仲獲得倫敦大學亞非學院碩士學位,喺美國哈佛商學院完成咗商界領袖課程,返港後積極參與慈善、外交同政治方面活動。

第一手消息請下載on.cc東網iPhone/iPad/Android/Windows Phone Apps