中環出更：教局助聽器服務再流標 楊潤雄要補鑊
教育局為聽障幼兒及學童免費提供嘅「助聽器驗配及相關服務」兩度流標，衞生服務界議員李國麟尋日直指計劃流標影響學童，要求政府交代點樣為嗰啲學童提供協助。搞成咁，教育局局長楊潤雄當然要補鑊喇！
政府要求全面檢視做法
究竟係乜嘢搞到呢個服務計劃兩度流標呢？政府都認衰，回應時承認教育局嘅招標工作唔完善，當局正尋求醫院管理局同聾人福利促進會合作，為學童提供助聽器服務。
呢啲都係臨時性嘅做法，都要有一個長遠同穩定供應嘅做法。政府就話，長遠而言會考慮係咪應該繼續以外判方式提供服務，或以公私營合作、委約方式等，以確保學童獲得支援。當局亦解釋，教育局只負責助聽器服務，人工耳蝸服務則由醫管局負責，令部分家長無所適從，所以政府已要求楊潤雄全面檢視點樣協助有需要嘅學童。
卓妮