政情：葉建源倡泵水谷排名增公共教育開支
香港鬧人才荒多年，遭狠批因輕視教育所致，其中公共教育支出更加喺全球排名中幾乎包尾。立法會教育界議員葉建源見政府搞極都唔掂，諗到好計準備獻畀財政司司長陳茂波（波叔），就係用錢買排名嘞！
葉建源尋日就新一年嘅財政預算案編訂教育開支及政策前瞻，當中提及舊年瑞士洛桑管理學院發表嘅世界人才報告中，香港教育支出只佔本地生產總值（GDP）百分之三點三，喺六十三個國家地區中只排五十六位。佢建議當局「泵水」將比例進一步提高至百分之四點八，咁排名就會回升嘞。
佢仲列出三十五項建議，當中不乏追求多年嘅訴求，包括幼稚園教師薪級表、增加中小學班師比、重啟學校改善工程等。雖然盛傳今年財政盈餘大幅減少，葉就話，波叔都話要準備應付逆周期，呢啲時候政府更應該有承擔，長遠投資於教育事業。