政情：三隧分流陳帆逼議員上轎

避重就輕未有提加價補貼

目前嘅三隧分流方案，當局擬將較多駕駛人士使用嘅紅隧、東隧收費會分別加到四十元，西隧就由七十元減至五十元，兼且係套餐式推出冇得改，姑勿論係價錢定做法都引起多個黨派反對。議會內外都未有共識之時，陳帆就預告會喺一月廿三日的大會上提無約束力議案，以討論實施推行三隧分流方案，但議案內容，當局巧妙地只講大原則，未有提及加價同補貼嘅價目，以尋求議會支持就方案修例兼向財委會申撥款。值得留意係，呢個議案有別於分流方案，議員可根據《議事規則》提修正案。

立法會交通事務委員會主席陳恒鑌回覆時，確認局方前日曾致電「打招呼」，擬提議案讓議員喺大會再作討論。佢認為現有方案似係未能夠喺議會內達成共識，歡迎當局願意攞出嚟再傾，希望各黨各派力陳利害後，同當局可一人行一步，直言若將唔能夠修改嘅方案「硬闖」議會，勢造成兩敗俱傷嘅局面。

被嘲冇信心獲大多數支持

委員會副主席譚文豪則未獲當局「打招呼」，認為呢啲民生問題，當局可以坦白啲同大家傾，相信不論黨派都會好務實咁表達意見，好似運輸署一直有同佢傾六隧分流或三隧分流其他可行性方案等，正正經經討論冇乜嘢，但依家倣效一地兩檢提個議案上嚟，令大家有好多猜測，唔知其背後實際嘅Agenda（議程）係乜嘢。但佢亦認同咁樣攞出嚟傾都好，畀機會大家「修正吓政府」，而且明顯當局冇信心取得大多數人支持，唔敢硬闖財委會，以議案作為試金石，成功就快手推展工作，失敗就有下台階「縮沙」。

議案屬好屬壞仍存在太多變數，一旦議員修正案獲通過，政府唔理就會製造矛盾，相反因為各黨派議見不一，未有一個修正案獲大比數贊成，隨時連政府議案都會被否決。到底陳帆可以賭贏民意，抑或一鋪清袋？就等月底揭盅。

對於運房局提呢個動議，政府發言人就話社會大致認同三隧分流方向，方案得到相當多持份者支持，且大讚分流可帶來多種效益，包括有效紓緩過海交通擠塞，釋放十個車龍阻塞嘅交通分流點等，希望議員從香港整體利益出發支持議案。