中環出更:金刀梁做手術最怕病人食田七

有「金刀梁」之稱嘅名醫梁智鴻,做手術無數,應該駕輕就熟,原來佢都有驚嘅時候,究竟驚乜呢?

話說工聯會工人醫療所成立嘅「康盈坊社區藥房」早前開幕,喺嗰度見到金刀梁,佢話自己信中醫,有啲嘢西醫都醫唔好,例如長期感冒、咳、長期敏感,西醫係撳住病情,佢依家幫人做手術,仲會問病人有冇食中藥。

點解?佢話港人常食嘅中藥包括田七,田七有薄血、去瘀功效,佢幫病人做手術前,有啲病人聲稱冇食薄血藥,佢就一定會再問病人有冇食中藥,因為若病人未停食田七就做手術,咁就麻煩嘞,即使做完手術都要最少兩個星期後先可以食田七,否則會流血不止。嘩!又真係幾危險喎。

麥美娟睇中醫氣色好咗

同場嘅立法會議員麥美娟就講起多年前整親腳,做完手術拆咗釘後,好耐唔消腫,當年都有食田七,西醫就建議佢可以試吓做針灸等,而近一年多來,唔少人話佢氣色好咗,其實佢依家幾個星期會睇一次中醫調理身體,醫生話佢肝、腎、肺都唔得,可能同成日捱夜有關,雖然氣色好咗,但成日唔夠瞓,又戴隱形眼鏡,個眼袋就始終都消唔到。

工人醫療所董事會主席黃國話社區藥房以非牟利性質營運,冀紓緩長期病患者嘅經濟壓力,以及提供更完善嘅基層醫療服務。工聯會榮譽會長林淑儀就透露,醫療所現址係沙士趁平買嘅,所以冇租金壓力,坦言如果要交租,做基層服務真係好困難,正如佢哋喺將軍澳一個商場做職業培訓同地區服務嘅位置,每次加租都加兩成幾,每月租金要幾十萬元,依家真係「雞肋」咁話喎。

卓妮

第一手消息請下載on.cc東網iPhone/iPad/Android/Windows Phone Apps