政情：黃之鋒新年願望：唔使再坐監
官司纏身嘅香港眾志秘書長黃之鋒仍然被法庭扣起護照，冇得離港。佢日前喺社交網站發貼，話新一年嘅願望，就係唔使再次進出監房。不過，前日佢帶住港獨標語再次衝入俗稱「公民廣場」嘅政府總部東翼前地，難道之前入獄都仲未反省夠？
佢亦有回顧去年，話記起去年初再度入獄，官司至今仲未完，擔心今年春季可能會再返入去，大呻冇護照出境冇得抖，感到好攰喎。翻查資料，黃之鋒涉及嘅佔旺刑事藐視法庭案的上訴，將會喺今年四月處理，而同案嘅社民連副主席黃浩銘舊年提上訴失敗，經已刑滿出獄。
周庭被DQ後平淡度日
另外，同屬香港眾志嘅周庭自去年初立法會港島區補選被取消參選資格（DQ）後，平淡過日子。佢尋日亦有發貼做回顧，提及舊年參選、DQ、助選，到最後去咗立法會議員區諾軒辦事處做嘢，舊年九月更為咗盡快完成大學畢業要求，喺學校修讀六個科目，慨嘆功課多到可怕。