中環出更：王國興交棒小花 唔角逐連任區議員
新一屆區議會選舉將喺今年底舉行，消息指今年即將七十歲嘅東區區議員王國興將不會角逐連任，預備交棒畀佢嘅「90後」徒弟李樂昕，有指李樂昕已跟隨王國興做地區工作約三年，之前曾係立法會前議員鄧家彪嘅助理，一五年曾參加區議會選舉，選區係沙田新田圍，據知工聯會希望以師徒制方式交棒培養新人，以傳承工運發展。不過，王國興回覆我哋查詢時就話，依家唔係合適講嘅時候，正式宣布嘅時候再詳細講。
何啟明接黃國健爭九東議席
另一方面，二○二○年將會舉行下屆立法會選舉，現任九龍東立法會議員黃國健亦將退休，據知工聯會內部喺兩個多月前完成遴選，多名九龍東區議員競逐下，身兼觀塘區議員嘅立法會勞工界議員何啟明勝出，料下屆將代表工聯會出戰九龍東選舉，工聯會亦決定支持鄧家彪下屆出選新界東。有工聯會中人認為，咁早決定人選係好事，始終立法會直選都需時準備，早啲決定就可以早啲開始做嘢。
另一名現任立法會勞工界議員陸頌雄就仍未有着落，內部一直醞釀係咪容許勞工界議員連任一次，但有指勞工界嘅人選未必需要咁早決定，直至區議會選舉後先有定案都未遲。
卓妮