中環出更：兩歲半囝囝拍片教煮食 陳志豪變緊張大師
依家唔少家長過分呵護令子女變成港孩，但亦有家長過分催谷而變咗怪獸家長，取得平衡都係一門學問。卓妮早排喺活動上見到唔少家長大談養兒心得，其中香港廣西社團總會副會長陳志豪嘅兩歲半囝囝拍片教煮嘢食，但呢位爸爸竟然緊張大師上身話其實唔放心喎。
公民力量早排喺沙田大搞盆菜宴慶祝成立廿五周年，能夠行到四分一世紀的確唔易，所以吸引到唔少人到場支持，好似保安局前局長黎棟國、香港廣東社團總會常務副主席簡松年及其兒子、國際青年商會香港總會會長簡汝謙、立法會議員容海恩、沙田區議員陳敏娟同黃宇翰等，非常熱鬧。
簡松年簡汝謙難得父子檔上陣
陳志豪囝囝早排拍片講煮食，人仔細細已經有板有眼，連刀都識用，佢仲話囝囝依家餐餐都參與其中，煮得比佢仲叻。但呢位爸爸見過囝囝切傷後，自言其實唔放膽畀佢煮嘢食，現時囝囝都係趁佢唔喺屋企先有得落廚喇！
育有兩個女嘅陳敏娟就話，家姐會喺大人傍住下煮嘢食，而細妹幫手洗碗，聽落好有分工。而佢同丈夫姚嘉俊都係區議員，間中就會帶埋兩個女落區，例如以派傳單幫佢哋練膽同待人接物。
簡松年就話難得以父子檔示人，而以往服務沙田區嘅時候，都會帶埋簡汝謙去，當訓練口才同統籌活動，最記得阿仔會蝦碌撈亂獎品，但簡汝謙就大呼無印象！
同場嘅黎棟國話當年出糧都會全數交畀太太，再等佢分發，笑稱自己被支配咁慘，更特登向新婚無耐嘅容海恩教路添！不過，容海恩就話時代唔同，男女講求財政獨立，反叫黎棟國同佢另一半講喎。
卓妮