政情:建制倡修例保私隱 候選人住址密冚

互聯網愈趨發達,訊息更為流通,令更多人關注私隱問題,但到底公職人員又有冇個人私隱呢?今、明兩年都係選舉年,聽聞建制派內有強烈聲音敦促政府修例,喺日後報名參加選舉時,其個人住址唔需要坦蕩蕩咁公開。不過呢項訴求喺建制同泛民兩派都有唔同意見,到底要點樣為公職人員私隱畫底線呢?

提出只寫候選人住邊區

立法會政制事務委員會今個月例會,將會討論二○二○年立法會換屆選舉嘅法例修訂,早前政制及內地事務局分別向各黨派收集過吓意見,據悉未必有極大改動。但係有建制派向當局提出要求,想日後唔好公開每位候選人嘅住址,可能寫住喺邊區就夠,不過當局亦有所保留,未有一口應允。

前議助個人資料被公開

聽聞事件與建制派議員陳恒鑌(阿Ben)有莫大關係。據說阿Ben議辦一位助理離職後喺屋苑做義工,畀一名區議員認出,仲去立法會睇阿Ben嘅開支申報,將嗰位助理嘅糧單等資料整合成傳單通街派,所以有人擔心將來議員嘅資料都會被人亂用,急急提出修例要求。阿Ben回覆時承認有呢件事,覺得議員係要畀公眾監察,但資料唔應該咁樣畀人派通街,對前同事帶來騷擾自己都覺得唔好意思。佢同時向立法會秘書處反映意見,職員就話交開支申報前,大家都明白資料會被公開,無得搞,故阿Ben將去信立法會行政管理委員會,要求檢討查閱機制。

有資深建制派議員認為,呢項要求無乜爭議性,例如去年曾經有信貸資料庫出現保安漏洞,第三者使用公開資料就可以攞到公眾人物嘅信貸報告,再加上可能有人盜用資料做不法之事,覺得有關做法存在隱憂。但亦有部分建制派議員覺得呢件事屬個別事件,好難因而叫政府修例。至於民主派,有部分人就覺得要視乎如何改。

鄭松泰唔用背脊對門口

政制事務委員會委員鄭松泰則覺得建制派想法「離地」,作為公眾人物就算唔公開住址,有心人想搵人,點都會搵到。佢近年出街都會好有警覺性,唔會喺街掛住睇電話,喺餐廳食飯亦唔會用背脊對門口,皆因唔知幾時會有不同政見嘅瘋狂粉絲衝上前搞事。

喺網絡世界內,個人資料已經係好公開,並唔係簡單話唔公布住址就可以解決。正所謂食得鹹魚抵得渴,做得公職人員就必然要受到公眾監察。既然大家意見不一,喺修例前或更應該好好探討邊啲屬於個人私隱嘞!

第一手消息請下載on.cc東網iPhone/iPad/Android/Windows Phone Apps