讀書一定要曳過先算青春過，英華書院早前舉行二百周年校慶晚宴，多名校友都分享青春時期嘅放肆任性，其中嶺南大學校董會主席歐陽伯權（Rex）仲自爆當年淨係掛住打籃球。

原來Rex屋企六個仔都係讀英華㗎，相信佢哋成績一定係好好嘞！佢話睇佢咁高就知佢以前喺英華打開籃球啦，由朝打到夜，唔識分天氣。咁唔使讀書㗎？佢就話「讀書嗰啲慢慢講啦，唔好被校長聽到喎」！

當佢一見到港鐵車務總監劉天成，即刻話「我唔知你係英華仔，早講吖，鬧你嗰陣時細聲啲吖嘛」，佢話英華太多年歷史，真係識唔晒啲校友。

其實劉天成留咗喺英華十幾年，唔好以為佢留班留咗咁多年，佢話自己拉開二胡嘅，中五仲開始教師弟拉添！畢業後，英華中樂團嘅指揮有事唔能夠繼續做，學校搵佢頂住先，唔小心就做咗十年指揮，好多人以為佢係老師。

政制及內地事務局前副局長陳岳鵬（Ronald）亦講起以前有唔少趣事。佢話當年知道數學老師就嚟結婚，剛好有日下晝要入禮堂聽聯校常識問答比賽，佢就同副校長講，想搵數學老師補課，所以唔入禮堂聽嘞，副校長同數學老師都好開心，以為佢哋咁乖想補課，點知一入到班房，佢哋就邀請數學老師坐喺班房中間嘅櫈上畀佢哋公審，包括問佢「你老婆點識嘅」、「邊個求婚」等等，師生樂也融融，仲要拋晒紙球添，點知審審吓，副校行過撞破，跟住就要佢哋入番禮堂聽比賽。Ronald原本都以為自己今次死梗，點知又冇事喎。

卓妮