政情：月薪1.2萬請議助 陸頌雄出手低過黨友
做議員助理真係好辛苦，又要幫議員睇住啲會議進度，又要落區做地區工作，仲要做埋小編，幫議員管理網頁，但人工就唔多理想。工聯會嘅立法會勞工界議員陸頌雄（Michael）喺勞工處貼廣告請議員助理，月薪係一萬二千蚊，對比黨友同樣係身兼東區區議員嘅立法會議員郭偉強，以及東區區議員何毅淦，佢哋請區議員助理分別出價一萬三千蚊至一萬五千蚊，以及一萬四千蚊。睇字面，Michael出手仲低過黨友喎。
要求有專上教育學位
根據網上廣告嘅資料，可以見到Michael請議員助理喺太子返工，資歷要求係專上教育、學士學位，良好粵語同英語，一般普通話，每日返八小時，每周工作五天半，不定時或需假日工作或超時加班，月薪一萬二千蚊，有雙糧，年假十二日，銀行假，有醫療保險。
至於郭偉強同何毅淦請區議員助理，郭偉強就請人喺北角返工，要求專上教育、副學位，要有兩年經驗，良好粵語，一般普通話、英語同福建話，每日返九小時，五天工作，輪休，月薪一萬三千蚊至一萬五千蚊，仲有交通津貼、雙糧同超時工作津貼，有銀行假同醫療福利。
何毅淦就請人喺杏花邨返工，同樣要求專上教育、副學位，要有一年經驗，良好粵語優先，一般普通話同英語，識PhotoShop等多種軟件，工作主動、積極，喜歡與人溝通，具備團隊精神，月薪一萬四千蚊，有醫療福利，每日返七至九小時，每星期工作五至六日，輪休，長短周。
話做夠3個月加人工
Michael作為勞工界議員，出手都低過黨友？佢回覆時解釋，一萬二千蚊係起錶啫，實際仲要視乎個別見工人士嘅情況，辦公室有學士，以至副學士嘅同事都唔止呢個價，實際好少同事低過一萬四千蚊至一萬五千蚊，其實做滿三個月，佢都會加人工，而且佢係為咗門檻定得鬆少少，高級文憑都可以應徵，因為唔係個個人都適合做議辦工作o架，希望可以搵到鍾意呢類工作嘅人咁話喎。