中環出更：范國威派月曆被當廢紙賣

年近歲晚唔少政黨都會向街坊派發新一年的月曆，不過印得多隨時會變大嘥鬼？有網民喺社交網站發貼，話有大量立法會議員范國威（Gary）嘅月曆被棄置街上，見相有唔少仲被拆去鐵絲，認真大嘥！不過，原來事件另有古仔。

已離港嘅Gary回覆我哋嘅查詢時否認棄置垃圾，話之前有街坊同佢講，見到有長者排隊攞咗幾本月曆後，拆去鐵絲同撕去有燙金福字嘅厚卡紙，直接當廢紙拎去賣，相信相中月曆就係長者賣廢紙拆落嚟嘅散件。

佢又話試過有一次喺沙田正街街市派月曆時，隔籬街就有廢紙回收站，當日長者重複排隊情況更嚴重，依家揀地方擺街站派嘢都特別小心，盡量唔好喺早上同派免費報嘅人一齊，「當見到公公婆婆攞住環保袋，見到你好似見到寶咁，你就知咩事了」，慨嘆香港太多貧窮基層。

卓妮