政情：赴澳洲睇囝囝畢業禮 龐愛蘭：似標尾會
本身係藥劑師嘅沙田區議員龐愛蘭（Scarlett），早前飛咗去澳洲出席個仔嘅畢業禮，仲同個仔周圍去玩，認真開心！Scarlett直言感覺好似「標尾會」咁，因為供書教學多年，終於等到個仔畢業，雖然明年只係實習，但應該「有啲錢」可以自給自足，唔使佢再照顧嘞！
寄語實習時把握實踐機會
Scarlett個仔都係醫學院畢業，所以佢寄語個仔喺實習時，可以把握機會學習同實踐，並以病人利益為依歸。雖然去澳洲嘅旅程只得四天，但Scarlett絕對冇浪費時間，去摸蜆、釣魚及墨魚等，一堆海鮮最後由個仔同女友一齊下廚煮幾味，睇落都有板有眼，唔知呢位女友算唔算係合格新抱呢？